Kokborok Maitang Bijap-2022 ~By~Kusumsa Tripura

 

Kokborok Koklop (Tripura Kokbai)

Kamagoi Thangnai Salsa

——Kusumsa Tripura

Kamagoi thangnai salsa ang-

Jonom mwnwi-kele tongalak o swngcharo.

Ang kamagoi thanglang-phung;

Mwktwi takalaidi ani bagoi kebo.

Maph khaijadi ano-nok—

Ani mungasuk chaya khaimani tongjakhaiba.

Kamagoi thangnai salsa ang-

Jonom mwnwi-kele tongalak o swngcharo.

Tongni mwchugoi phung tongmaliya ang;

Chani mwchugoi phung chamanliya,

Ani jora sokphaika mathangsinai ang.

Lama koreni similungo;

Ang thangjanai kamagoi aro;

Ano palokgoi thangnai daktwi nok-ano.

Lama koreni similungo;

Ang thangjanai kamagoi aro;

Kaisaphung chegoi-phugoi naigalak waisa-phung ano.

Ang kamagoi thangmani yagulo phung-

Nok tonglaijadi joto mwnwi-kele khayoi;

Ang kamagoi thangja phung—

Joto tonglaijadi gam kwrwng khayoi.

Ang kamagoi thangmani yagulo-

Ani bagoi kaisasuk doi kapnai tongno?

Ang kamagoi thangmani yagulo-

Anglai nokno khatangnai-noklai ano khatang galak?

Kamagoi thangnai salsa ang—

Jonom mwnwi-kele tongalak o swngcharo.

Ang kamagoi thangmani yagulo—

Tongalak kaisaphung ani koreyo.

Ang kamagoi thangmani yagulo—

Kwlwi phugo ma ano bini khuriyo abuk charogoi,

Karakok sagoi mwthumani rok,

Bakha kagoi mwktwi kalainai ang iphugo.

Ang mathangsinai o swcharno yakaroi;

Mwktwi takalaidi ani bagoi kebo;

Nok tonglaijadi jotono gam kwrwng khayoi.

🙏🙏Hambai🙏🙏

Kwtal Kokborok Koklop-2022 ~30/03/2022

Chini Sinimung Tiprasa

 ----Kusumsa Tripura

Chini Achaima Ha Tripura,

Chini Sinimung Tiprasa.

Sa ra charchi brwi Bisi Romoi,

Bubagra-rok Twiduloi Kwlangma ha.

Chwng Janajatiya, Adhibasiya,

Chini Kaisa no sinimung Tiprasa.

Tini chwng buini Bwsabai,

Satok, Pitok khaijagwi tongkha.

Tini chini ha o buini bosongbai,

Hani bwsajwk rok romfre jagwi tongkha.

Ama Tripura hani mokolni,

mwktwi thakliya.

Tei Bwsuk chwng buibai satokjagwi,

Romfrejagwi, ha sekjagwi tongsinai.

Tripura hani ni rangchakni bwsa rok,

Sicha Sidi, bachalai Sidi,khorang tisalai Sidi.

Chini Amani Kok Kokborok,

Bwsuk se khunathok.

Chini Tripura hani bwsa rok,

Kok Sao Kokborok Kok.

Chini Tiprasa ni Rwchapmwng,

Jadu Kalija,Jadu no khilimani.

Chini Achaima ha Tripura,

Chini Sinimung Tiprasa.

🙏🙏Hambai 🙏🙏

Kwtal Kokborok Koklop~30/03/2022~

Ma-pha No Borom Rwdi

                         Swinai~Kusumsa Tripura

Ma-Pha no borom rwdi,

Ma-Pha no hamjak di.

Ma-Pha no borom rwya,

Bo hamari manya.

Ma-Pha no borom rwtwi,

Borok no bo borom rwdi.

Yakhili kana rwngma bai,

Himna phwrwngnai no tapok di.

Yago homchang matwi mabai,

Molbrum-ni pohor man kha hinwi,

Khao ta wansok di.

Sak-sak no torjagwi kungchuknai borok,

Bini langma daktino mwnak nai.

Ma-Pha no borom rwdi,

Ma-Pha no tekto tarwdi.

Ma-Pha no borom rwya borok,

Bo hamari manya no wngnai.

O swngcharo ma-pha no karoi,

Tei kebo kotor kwrwi.

Ma-Pha no borom rwya borok,

Bo dopha no bo borom rwwi manya.

Ma-Pha no hamjakya borok,

Bo dophani lukurok nobo hamjagwi manya.

Ma-Pha ni kok khwna di,

Ma-Pha ni kok romdi.

Ma-Pha no borom rwna swrwng di,

Ma-Phano Hamjak di.

🙏🙏🙏🙏HAMBAI🙏🙏🙏🙏

TIPRASAROGNI PAITHAKNI CHOBA

  Poet—Kusumsa Tripura

Tiprasarogni paithakni choba,

'Greater Tipraland'.

Tiprasarogni paithakni sanmung,

'Greater Tipraland'.

Chini achaima haa Tripura,

Chini kaisa no sinimung Tiprasa.

Chwngle jonojatiya, adhibashiya,

Chini kaisa no sinimung Tiprasa;

Chwngle bwma kaisani bwsa.

Tini chwng buini bwsabai satok,pitok,

sakni manthaino sekjakgwi tongkha.

Tini sakni ha o buini bosongbai-

Hani bwsajwk-rog romphre-sokphre-

khaijakgwi tongkha..!

Aboni bagoi chwng nango'Greater Tipraland'.

Buini bosong khe chawi chabaiya,lawi labaiya,

Tini haani bwsarogkhe hachuk khurini birman kakya.

Ha Bubagra bwsuk se mwktwi yorwi,

kha silikgwi kabwi tong…!!

Hani bwsarogni birman nugwi.

Phaidi chwng kwchak,kormo,kuphur,

Hindu,Christian,Buddha,Muslim,Sikh,

Debbarma,Tripura, Reang,Kalai, Rupini,Lusai,

Hinlaiyawi chi-chuku dopha pal khe,

thansa khe khorang tisanai'Greater Tipraland.'

Phaidi takhuk-song,phaidi bukhuk-song,

kubuini lamao himlainai,haa bugrano logi rwlainai.

O choba bubagra ni saichungni choba-ya,

O choba chini tiprasarogni paithakni choba se,

O choba tiprasa ni birmano sokomornai choba se.

O choba tiprasarogni paithakni choba-

'Greater Tipraland.'

O choba tiprasarogni hamkrai ni choba se–

'Greater Tipraland.'

Nangkhe thwi rwnai,langma rwnai,

Chini hano buino rwya.

O choba tiprasarogni paithakni kotor choba-

'Greater Tipraland.'

Phaibaidi pal khe khorang tisalainai,pal khe chiriklainai,

pal khe chini manthaino sanlainai-

'Greater Tipraland

Buini manthaino chwng sanya,buini hano chwng sanya,

Chini manthai no se chwng sanjao,

chini achaima hano se chwng sanjao-'Greater Tipraland.

Phaidi saming tangwi,homchang twwi nongkhordi-

Haa bwsarogni birmano sokomornai paithakni chobao-

'Greater Tipraland, 'Greater Tipraland.'

✊✊Tiprasa Ayuk Lokthong

🙏❤🙏Bubagra Ayuk Lokthong

Kwtal Kokborok Koklop~04~04~2022

|| RANGKHOKMA ||

         Swinai—Kusumsa Tripura

O Rangkhokma O Rangkhokma

Nono nugwi khapang tongthokkha tini ani;

Nono nugwi ang rang mantho-thok wngo tini.

O Rangkhokma O Rangkhokma

Nwngle phot-phot balsa katigo;

Ang tini tongthokjak nono nugwi.

O Rangkhokma O Rangkhokma

Ang tini kha swrangjak nono manoi

Malaiya balokjak kukdukma sal romoi.

O Rangkhokma O Rangkhokma

Yak-yakung kongbrwibai maltiro bolai

Angle tini rang mansinai.

O Rangkhokma O Rangkhokma

Gana-gini rekewi tongdi nwng ani

Saichung yakaroi tathangdi nung ano.

O Rangkhokma O Rangkhokma

Nini bekarang kangnwibai birsagoi tathangdi

Nini naithok goron no naibo akaya anglai.

O Rangkhokma O Rangkhokma

Nono nukkhe agio achu-achoi salangma kokrogno mwitu mano anglai.

O Rangkhokma O Rangkhokma

Agio Achu-achoi samalangma hai nono nukkhe rang mantipho;

Ano kisa tini rang manrojasidi hinkhai.

O Rangkhokma O Rangkhokma

Ang tini rang mankhe nono charonai manwi rang khokbani payoi.

Awa.. Wa.. Wa.. Tokke

Kokborok Koklop Kwtal~05~04~2022

|| PORIDI CHERAIROK ||

      —Kusumsa Tripura

Poridi Cherairok–

Kaham khe porilaidi.

Poridi Cherairok–

Jotono elemgwnang wngbaidi.

Poridi Cherairok–

Poriya ta-tongbaidi.

Poridi Cherairok–

Kha riwi,saktharoi porilaidi.

Poridi Cherairok–

Hayungni lukurokbai sinijakdi.

Poridi Cherairok–

Khatal bisingo haboi ta-tongbaidi.

Poridi Cherairok–

Jotono rwng kwrwng wngbaidi.

Poridi Cherairok–

Hamyano khibiwi,kahamno swrwngdi.

Poridi Cherairok–

Norok-no thinangni chati.

Poridi Cherairok–

Ma-pha ni birmano sokomor-di.

Poridi Cherairok–

Ma-pha ni imangrogno mwkthang khwlaidi.

Poridi Cherairok–

Nini imangrogno mwkthang khwlaidi.

Poridi Cherairok–

Norok-no dophano naikoldi.

Poridi Cherairok–

Norok-no dophano mwthangsidi.

Poridi Cherairok–

Kaham khe porilaidi.

Poridi Cherairok–

Jotono bwkango himlaidi.

Kokborok Koklop Kwtal~05~04~2022

|| KHUNGRI KAPALA ||

         —Kusumsa Tripura

Wansogoi naikhai khakama phaio,

Ani nukhungni biyalno nugwi.

Saichung saichung achokgoi;

Bakhano phirok-phikorok khe naikhai,

mwktwi choroimoi kalaio ani.

Basarni watwi,nobar phaikailai,

Bakhago wanama-chinama phaio ;

Ani nukhung kungri kapala nokno,

khukgoi doi tilanglangno,

koboinoi doi thanglangno.

Thuiyamo tongoiphung,Mai chatotoi phung;

Khungri kapalatoi nuksago talni pohor,

handugiri jik-jik,jak-jak.

Ang mwtwrwi thangphugo,imang gam nukphugo,

Khungri kapalatoi toi kalaisonoi huru-buru wngo ang,

Ani imang gam no palak rogo.

Uttar atani nobar siboi nokha manaksakai,

Ani bakhago wanama phaio.

Tokma tuimani sal balo ang wanagoi;

Mokolni mwktwi kalaimani sal bal-ya.

Dalo- samprabai mai khopcha chagoi phung,

Hopung sapung wansokmanibai hor- sal laio.

Bakhago jala nangoi matongo,

Bigra nukhung ongmani bagoi,

Hani bara lachi-kiri ongoi tongni nangkha ang.

Bigra nukhungni biyal nugoi,

Sak chalai mare-kiching rogbo,

kok sani naiya kebo angbai,

Chaltoi chaltoi chaloi thangkha saichung kalangoi ano.

Bini nukhungni tongthok,chathokno nugoi,

Bakha kubuksagoi phaio,

Mokolni mwktwi choroimoi kalaio ani.

Gusaing Raja ni yakungno romoi,

Yak jur khai khulumjago, ang biya kunu rangkhok puisa,

biya kunu thongthok chathok, biya dalan kutha,jaga,jobin;

Ang biyo ma-pa bai mwnwi-kele,

ang biyo swngcharni borok jottono gam kwrwng khayoi tonjadi hinoi.

|| Baithang Hamjakmani Kothoma ||

—Kusumsa Tripura

Je phuru kebono hamjaknani hapharo kulukgoi thango. A phuru a hamjakma tongthokni swlai tekto aba jala rio… ! Mokolni mwtwi chorom riwi teibo tekto rio.Je phuru ano sao–Nwng tekto mankhe ani khapang mwnakgoi thango..Aphuru no ani bwkha teibo tongchorya wngo.. Kebono tekto aba jala rikhe nwngbo waisa le jala aba tekto mannai.. Abo tini aba khunap wngnai. Nini bo jora phainai.Aboni bagoi "kebono puitu khwlainani swkang kisa wansokgoi puitu khwlaidi. Tamoni hinkhe waisa wuisu sakni buwa sakni bwslaino waroi rio".

Hamjakma abohaiya je keboni bwkhano jala riwi nwng kaham tongmani. Hamjakma abonose hino je kaisabai kaisa borom rwlaimani.Kebo keboni bagoi langma choya. Jotto kubuino kwthang tongo.Thuiui thango hamjakma tei chongjak imangrog.Twio kochoktwi kochogwi thango kwnwi ni bisingo swmai tanglaimani. Swmai rwlaimani-talbai athukiri haikhe gana khe tonglainani hinwi. 

Hamjakma kaisa sinimung, Bwkhabai bwkha kwrwnglaimani kwnwi ni bisingo kwtal halog bojaklaimani. 

Phiya swbai phuru le saichung no aba kaisano halok swbaio. Jungjalo kwlaikhe kebo kwrwi khe ani ganao saichung se siring-siring. Mwtwi rogno karoi tei kebono logio manliya. 

Borokrogni laithangjak kwcham kothoma rogno tei swlaiwi manya. Phiya thinangno naithok khe swnamoi mano.

Hamjakma je rio, abohai tanwi lamani bo bangkukgo. 

Jotto sinimung rogni paithakni kokrog wngo-'Nwng kaham tongdi'. 

Mwkhangni naithok goron no nugwi hamjakmani wngkha-swrapsani hamjakma. Tei bwkha,bini tong gwrwng no nayoi naithokjakmani,hamjakmani wngkha kubui hamjakma. Hamjakma thangwi tongo khoroknwini puitu khwlaimani bisingtwi. 

Saichung yakaroi takwlangdi hinwi sanai borokrogno daktwi yakaroi saichung kwlangwi thango.Jeswk tor-rwk, tor-rwk tongthokmarog teibo hakchalo kwmawi thango. 

Mokolo twi luwoi rwnai logi song le mankha.Phiya mokolni mwktwi huwoi rwnanani bagoi tabukbo kebono manya kho.Jotto borokno sao-bini sinimung baiyoi thangjak rogno pogwi thangnani.Phiya sai-sai chaitokmani yagulo phano abo wansokmung hai wngya.Sakni bwkhani tekto rogno bwkha bisingo no tonidi.. Kebono tasadi. Tektoni kokrog joto borokno bujiya,baksa borok khe chaya nwngya karoi tektono teibo kwbang khe tisa o. 

Kebono sakni swlai kwbangkhe hamjakna tathangdi, aboni buthai tekto aba jala no karoi nwng tei mungsa mangwlak. Tekto manwi tongnai a tekto nwng jorom sowoi bo mangwlak,thuibo mangwlak. 

Hayungni jottoni swlai kwlwi manwi wngkha 'borokni bwkha'. A kwlwi bwkha no swbainani nangya kunu holongthai,aba nangya kunu 'hantura'(Hammer). Bwkhukni thaisa thainwi nang-nangya kokbaino bwkha bayoi thango. 

Kebono jaikhwlaiya khai khe bwsuk tekto wng.. Abo nwng aphuru no bujinai. Jephuru nono bo kebo jaikhwlaiya, naikolya hinkhe.Nwng ano salsa kok rwjak hayungni bebak swlaijagwi thangphano nwng swlaijakya hinwi.A swmairog boro, biyang thangkha? 

A kokrog siya nukya kobor haikhe puitu khaijakkha ang.

Tabuk hayung le kaham no tongo. Phiya nwng simi se swlaijakgo. Ani bwkhano swlaio.

Nono hamjakgwi ang kwraiyoi thangya.Kubui hamjakmani tekto abono rwtugwi mankha, bujiwi mankha, sawi mankha ang tabukle. 

Kubuino nono hamjakkha.. Aswk kheno hamjakkha e langmao nono hamjaktwi kwtal khe tei kebono kwtal khe hamjakma ta-achairithong.Thuiyasakni nono no mwitu manwi tongsinai.. Pogwi thangwlak.Langma jeswk tongsak nono no mwitu manwi tongnai. 

Kaisa kosom bwrwi tei kaisa dugri(pocket) bukcha chwla mankheno bujiwano. Baithango abo tamo manwi?Dugri aba pocket bukcha nugwi phano a chwla ni ganao je bwrwi tongo.. Abono kubui hamjakmani baithangni kothoma. Kosom bwrwi hinwi le tamo wngkha ba? Kubui bwkha le tongna ble? Dugri aba pocket bukcha chwla hinwi le tamo wngkha ba? Bini bo salsa le salsa pocket kuplung rang wngnaina ble? Haiya khe kubui hamjakma le tongna ble? 

Naisingwi bono no tongdi. Je nono kubui bwkha bai kha rinai, Nwng abono kha riwi hamjakdi je nini khani kokrogno bujinai, nono salbrum mwitu mannai nini kokno pirnai. 

Jeswk sai-sai jwngjalni kwcharo tongphano. Nini yakno yakaryawi kwrak khe romwi tongnai. 

Langmao khoroktham borokno tanakardi:-

*Hamjakya karoi hamjakmano lachimung rwnai. 

*Bayap-chari sepni mungwi je phemoloknai. 

*Je nini puitu no swbainai aba nawi thungnai bono. 

Jorabai baksa baksa thamchi-homchi rogbo kisa misa wngwi thango. Phiyaba kebobai tekto aba jala rujakmani marikrogno le swrapsabai pogwi manya.Bwkhao tektono manwi tongsinai. 

Je borok nono hamjakya nwng bini bagwi mwktwi ta-khiklaidi..Nini a mwktwi mungsa samungo phano chukya.

Je borokni bagwi hor-sal bwkha bising-bising wansokgwi o Swngcharni angno kaisa tekto aba jala manwi matongkhwna.Salsa bono sanai—sabo nono ani bagoi mwktwi khikkaidi hinwi sa?.. Ani langma le chowi thangnai kha… !! Nwng tangwi aswk ano jala rwkha? Nono hamjakma de ani ba chaya wngkhana? 

Nukhungno aba nunkhungni borokrogno kiriwi. Jephuru phano sakni kubui hamjakmani borokno yakaroi tarwdi.Tamoni hinmale nini kubui tei kwthar hamjakma tongkhe tiniya khwnap nono nukhungni borokrog gosiwi nanai. Bwkha tonidi nukhungni bagoi je hamjakmano yakaroi rwnai. Aphuru nwng chongwi nadi bo nono kubui bwkhabai hamjakya, abo swrapsani bagoi bwkhano tongthok rwnai hamjakma se.Bo nono jala aba tekto rwnani bagwi se hamjakgo. 

Je nini bagoi o hayungo phaika bono manna bagoi,tekto bo manglak jala bo manna nanglak.Kisa naisingdi.. Jora kubuino salsa norok kwnwino malai riwi rwnai.Nini bagoi salsa sal pasaphinai.Jora no naisingwi tongdi… . .!!!! 

Kokborok Koklop—21/04/2022

|| Apha Nwng Tabuk Boro? || 

Poet—Kusumsa Tripura

Apha nwng boro Tabuk? 

Bahai tongja nwng tabuk? 

Apha nwng boro Tabuk? 

Angle tongna mwchungliya nono karoi. 

Apha nwng boro Tabuk? 

Chwngle khatangsukkha nono belai. 

Apha nwng boro Tabuk? 

Apha nwng kaham kwrwng da tongja Tabuk? 

Apha nwng boro Tabuk? 

Kha khaio apha nwng kaham no tongjana hinwi. 

Apha nwng boro Tabuk? 

Apha nwngle chwngno khatangya de kisa phung? 

Apha nwng boro Tabuk? 

Nwng kwrwi kha swrangya ani sakduk. 

Apha nwng boro Tabuk? 

Apha nwng tangwi ama no yakaroi kwlang saichung? 

Apha nwng boro Tabuk? 

Apha bahai tongja nwng Tabuk? 

Apha cheraiphuru nwng ani yak romoi himnani phurungmarog,

Apha ang mwktwi choromoi makabo a salrogno mwitu manwi. 

Apha nono kap-sni kabwi, ring-sni ringwi bo, 

Nwng tei chwngbai nukjakgwlakkha. 

Apha nwng ano hamjaktwi, 

Ano tei sabo hamjakjak sinai? 

Apha nwng ano khairoktwi, 

Ano tei sabo kharognai tongsinai? 

Apha nwng hai maya gwnang, 

Ang tei boro mansinai? 

Apha nini kokno sawi bo sabaiya, 

Apha nono twwi wansokgwi bo wansokgwi paiya. 

Apha nwng kwthang tongphuru ani achaima sal palaiamani, 

Apha ang a salrogno mwitu manwi makabo. 

Apha ang cheraiphuru nwng hati ni chajaknai manwi ani banta tubumani, 

Tabukle sabo charo phaisinai,sabono sachinai ang? 

Apha nwng boro Tabuk? 

Apha salbrum nono mwitu mano ang. 

Apha nwng boro Tabuk? 

Chwng mwitu mantwi,nwngbo de mwitu man apha? 

Apha nwng naisingwi tongdi, 

Angbo phanai salsa nini thani. 

Kokborok Koklop-18/04/2022

|| Apha Wngkha || 

             Poet—Kusumsa Tripura

Apha Wngkha—

Ani yak romoi puila himnani phurungnai sa. 

Apha Wngkha—

Chini sinimungni puila sinimari. 

Apha Wngkha—

Nokhani athukiri hai.

Apha Wngkha—

Tokke ni super hero hai. 

Apha Wngkha —

Hor-sal satung watwi manjakgwi tekto nangwi samung khaiphano, 

Nogo kiphilphuru khe nwnwi warik-warik. 

Apha Wngkha—

Jeswk tekto,jala manwi phano jorom sowi tongjanai sa. 

Apha Wngkha—

Kaisa chobani Sengjrak hai. 

Apha Wngkha —

Yak romoi puila o swngcharno phunuknai tei hinmani phurungnai. 

Apha Wngkha—

Langmao puila manmani ani khani borok. 

Apha Wngkha—

Sak chaya, nungya karoi chini bagoi khoksa-khoknwi rang khatiwi toninaisa. 

Apha Wngkha—

Jeswk machaya-manungya tongphano bwsarogno abo sicharwnani aba bujirwnani thangya. 

Apha tongkhe khorok sakao kaisa sanpli tongmahai matongo. 

Apha Wngkha—

Sakno tekto riwi bwsani thinangno kaham khe tisanai. 

Apha Wngkha—

Biringphang bwphango puila sal pamani kwchang sampli hai. 

Apha Wngkha—

Sak ri-chum kichik kanwi chwngno ri-chum painani rang rwjanai.

Apha nwng hanjaktwi,khairoktwi

Nono karoi ang tei sabono mannai? 

Apha nwng ano yakaroi thangkhe, 

Ang o swngcharo tei sabobai tongnai? 

Apha nwng ano yakaroi thangkhe, 

Ano sabo naikoknai,jaikhwlainai tongsinai? 

Apha ang nono thaisa kok sanani khao khatijak tongo, 

Apha ang nono belai khe hamjakgo. 

Kokborok Koklop—25/04/2022

|| Naithokti Ni Achaima Sal ||

Poet—Kusumsa Tripura

Naithokti puila nini achaima salo

Ani khani hamjakma tei kha kha kaham yapharo. 

Ani Naithokti tini belai tongthojak

Angbo tongthojak nini achaima salo.

Ani naithoktino tamo manwi yapharnai

Ang wansokgoi manliya ani khao.

Mungsa rwmanya phano

Naithokti nwng ano ta-jolidi dow

Naithokti nwng ano nakardi. 

Naithokti  nwng tini ni hai sal kaham khe

Ayuk kolok khe thuiysakni kaham kwrwng khe tongjathong.

Naithokti ani kubui tei kwthar swrimungbai

Nwng salbrum tei molbrum no kaham kwrwng khe tongthong. 

Khao le muchungo nini achaima salo, 

Nono kwbang kwbang khe manwirog yapharnani

Khao le muchungo nini achaima salo, 

Nono kotor kotor restaurant rogo mai charonani. 

Khao le muchungo nini achaima salo, 

Nono Kaisa kotor surprise rwnani.

Phiya ani chukjayani bagwi nono

Ani khani mwchungtwi,nini wansokmung hairog wngliya.

Naithokti nwng ano nakardi

Ang nini bagwi mwngsa khwlaiwi manliya.

Nini achaima salo ang abono swrijao

Tini ni hai tongthokma hai khe,

Nwng salbrum no tongthokgoi tei kaham kwrwng khe tongjathong.

 

Nwng o hayungo tongthokni bisingtwi no achaijak

Abono salbrum palainani nango tei palaiwi thangdi. 

Ani bwkhao wansokjak, 

Nini achaima salo ang tamo rwmani cha?

Je manwi nini thani thuiyasakni tongnai.

Phiya mungsa riwi manliya ang nono, 

Naithokti ano nwng nakardi.

Tongrukkha ani bwkhao kaisa khorang

Je khorangrog bwi khwnaya khorang. 

Naithokti nwng ano nakardi, 

Nini achaima salo nono mungsa riwi manliya. 

Khao khayo nwng ano nakaroi rwnai hinwi, 

Naithokti nwng salbrum no kaham kwrwng tongdi.

❤❤❤❤❤❤❤❤❤❤❤❤❤❤

Kokborok Koklop—23/04/2022

|| Naithokti Bai Malaiya ||

Poet—Kusumsa Tripura

Ani Naithokti bai malaiya balukkha

Bahai tongja Naithokti nwng Tabuk?

 

Kha khaio kaham no tongjana hinwi, 

Angbo kaham no tongjago. 

Ani Naithokti No khatangsukkha

Nwngle khatangma phaio de ano? 

Naithokti nono karwi tongwi mangwlak, 

Angle nwngbai swrapsa phano chalwi. 

Tongtotwi chatwtwi mwitu nono, 

Angle tongna rwngliya nono karoi. 

Sarikni sal kwchang jora rogo, 

Ani Naithokti bai khapangni kokrog sanani mwchungo. 

Ani Naithokti bai nukkaiya balukkha

Buphuru nuklaii sinai tei waisa nwngbai.

Naithokti chwng nuklaiya phano

Nwng ano pogwi tathangjadi. 

Naithokti nono twwi bwkha kwbangma wansokjak

Phiya buphuru a kok sanani sal kaham phaino ang naisingjak. 

Naithokti no naisingwi tongtwi-tongtwi

Twwarini twi ranma hai ransajak ani khapangbo. 

Buphuru a sal kaham phaino, 

Nono ani khatijak kokrogno masano.

*************Kwchajak*******************

Kokborok Koklop—21/04/2022

|| Kok Khanadi ||

Poet—Kusumsa Tripura

Kok Khanadi kokno bujidi

Kok sakai khunjur kaichomoi khanadi. 

Okrarog kok sakai gam khe khanadi

Bakhago chongoi ladi, buju mandi. 

Kokno bujidi, kokno khanadi

Kokno bujiyagoi thamchi takadi. 

Okrarog Kokno khunjur kaichomoi khandi

Khanagoi Buju mandi,Gyian hapdi. 

Ma-pha ni kokno Khanadi, 

Ma-pha ni kok romdi. 

Ma-pha ni kok khanatoi, 

Borokni kokbo khanadi.

Kok bujiwi kok sadi, 

Kok sanani sakang gamkhe wansokdi. 

Kok kaisabai chwng thango

Kok kaisabai chwng thwio.

Kok kaisabai chwng lachimung mano

Kok kaisabai chwng makhang bayo. 

Kok khanadi kokno bujidi

Kokno bujigoi kok sadi.

(20th State Level Buisu Festival-2022 Ni Horo Swimani, Thai:-Duma cherra thungnok khola)